Menzu chilu di farina,25 gr, di lévitu di birra, latti quantu basta pi fari 'na pasta cchiuttostu morbida, zùccaru, cannella 'n pùrviri e vaniglia, ògghiu abbunnanti.
Méttiri 'a farina 'nta 'na cazzalora larga e iàuta; juncìricci 'u levitu, un pìzzicu di vaniglia e un cucchiaru di zùccaru;
méttiri 'u latti pocu ogni vôta e quadiatu a timpiratura di vacca. Travagghiari assai chî mani 'a 'mpastata chi havi 'a divintari bedda morbida. Cummigghiari 'a cazzalora c'un cummògghiu e fari 'llivitari quasi ô càudu, vicinu e furnelli dâ cucina. 'Spittari chi 'a 'mpastata si sulleva e chi supra supra prisenta tanti mpuddi.
Fari càdiri 'ntôn pignateddu cu assai ògghiu bugghienti picca quantità di 'mpastata usannu un cucchiarinu di café o di té, a secunnu dâ 'rannizza chi prifiriti, spincennuli câ punta dû ìritu.
Quannu i badduzzi su 'beddi 'ndorati, passàrili 'ntô zùccaru câ cannella e accussì 'nzuccarati sistimàrili 'ntôn piattu.
